தமிழ்சினிமாவில் ஆவி பட ட்ரென்ட்டை ஆரம்பித்து வைத்ததே லாரன்ஸ்தான். அவரு முனியில் ஆரம்பித்த அந்த வேப்பிலை அடி, அதற்கப்புறம் காஞ்சனா படத்தில் கலெக்ஷ்ன் அடியாக உருவெடுத்தது. சில கோடிகளில் முடிக்கப்பட்ட காஞ்சனா, கிட்டதட்ட முப்பது கோடிக்கும் மேல் லாபம் ஈட்டியதாக அப்பவே பால்குடம் எடுத்தது விநியோகஸ்தர் வட்டாரம். அதற்கப்புறம் காஞ்சனா 2 ஐ உருவாக்கிக் கொண்டிருந்த லாரன்சுக்கு நடுநடுவே பேய் ஆவி பில்லி சூனிய சக்திகள் இடையூறு செய்தனவோ என்னவோ? படப்பிடிப்பில் மயங்கி விழுந்தார். உயிருக்கு ஆபத்தான நிலையில் சிகிச்சை பெற்று மீண்டும் இந்த காஞ்சனா 2 ஐ கையில் எடுப்பதற்குள் வருஷங்கள் உருண்டோடின.

அதற்கப்புறம் அவர் ஸ்டைலிலேயே படம் எடுக்க ஆரம்பித்த பில்லி சூனிய ஆவிப்பார்ட்டிகள், கலெக்ஷனை தாறுமாறாக குவிக்க ஆரம்பித்திருந்தார்கள். இருந்தாலும் லாரன்ஸ்சின் திரைக்கதை மவுசுக்கு இன்னும் தியேட்டர்காரர்கள் மத்தியிலும் விநியோகஸ்தர் மத்தியிலும் வெயிட்டான மரியாதைதான். இப்பவே படத்தை பெரும் விலை கொடுத்து வாங்கிவிட்டார் அமரர் இராம.நாராயணனின் மகன் முரளி. தேனான்டாள் பிலிம்ஸ்தான் இந்த படத்தை உலகமெங்கும் வெளியிடுகிறது.

தனது விளம்பர அட்டகாசத்தையும் ஆரம்பித்திருக்கிறார் லாரன்ஸ். சில தினங்களுக்கு முன் வெளியிடப்பட்ட அவரது படம் ஒன்று கோடம்பாக்கத்தில் பெரிய எதிர்பார்ப்பை உருவாக்கியது. இப்போது சென்னை மற்றும் தமிழகமெங்கும் ஒட்டப்பட்டிருக்கும் ஒரு போஸ்டரில், பாட்டி வேடத்தில் இருக்கும் இந்த நடிகர் யார்? என்ற கேள்வியை எழுப்பி பெரும் பரபரப்பை ஏற்படுத்தியுள்ளார் லாரன்ஸ். படத்தின் பெயரோ, கம்பெனியின் பெயரோ இல்லாவிட்டாலும், அது லாரன்ஸ்தான் என்பதை சினிமா ரசிகர்கள் கண்டுபிடித்துவிட்டார்கள்.

கமலுக்கு பிறகு இப்படி மேக்கப்பிலும் கச்சிதம் காட்டிவரும் லாரன்சுக்கு பெரும் பாராட்டுகள் குவிந்த வண்ணம் இருக்கிறது.

பார்க்கலாம்… பாட்டியம்மாவோட அராஜகம் படத்துல என்னவா இருக்குன்னு?