கூரையில சோறு போட்டா ஆயிரம் காக்கா என்கிற பழமொழிக்கெல்லாம் இப்போதுதான் அர்த்தம் தெரியவருகிறது. ரஜினியிடம் பெறப்பட்ட பனிரெண்டரை கோடியை கூரையில் எறிந்துவிட்டு ஆயிரம் காக்காய்கள் அதை சுற்றி சுற்றி வட்டமடிக்க, உருப்படியாக ஒரு பருக்கையும் சிக்கவில்லை எந்த காக்காவுக்கும். இப்படியெல்லாம் நடக்கும் என்று தெரிந்துதான் நீங்களே பிரிச்சுங்கங்க என்று கூறியிருப்பார் போலும் ரஜினி.

லிங்கா விவகாரத்தில் சிங்காரவேலன் தலைமையிலானவர்கள் தொடர் போராட்டம் நடத்தி ரஜினியை பணிய வைத்தார்கள். அப்போது பெறப்பட்ட தொகைதான் இந்த பனிரெண்டரை கோடி. இதில் ஐந்தரை கோடியை மட்டும் சிலருக்கு பிரித்துக் கொடுத்துவிட்டார்கள். மீதி பணம் எங்கு போச்சு என்பதே யாருக்கும் தெரியவில்லை. இவர்ட்ட இருக்கு, அவர்ட்ட இருக்கு என்கிறார்களே ஒழிய, பாதிக்கப்பட்டவர்களுக்கு பணம் வந்து சேரவில்லை. பணத்தை மொத்தமாக வைத்துக் கொண்டு தரமாட்டேன் என்கிறார் என்று இவர்கள் கையை காட்டுவது பிரபல விநியோகஸ்தரான திருப்பூர் சுப்ரமணியனை நோக்கி. பொறுத்து பொறுத்து பார்த்த விநியோகஸ்தர்கள் இன்று மாலை பிரஸ்மீட்டை கூட்டிவிட்டார்கள்.

இதில் இருபது நிமிடம் ஓடக்கூடிய ஒரு வீடியோ கிளிப்பிங்ஸ் திரையிடப்பட இருக்கிறதாம். அந்த வீடியோ பதிவுக்கு இவர்கள் வைத்திருக்கும் தலைப்பு, ‘ரஜினி அனுப்புன அந்த சொப்பன சுந்தரி யாருகிட்ட இருக்கா?’ லிங்கா விஷயத்தில் பஞ்சாயத்து பேசும் பல விஐபிகளின் பேச்சை அப்படியே ஒளிபரப்பி அதற்கு பொருத்தமாக வடிவேலு, செந்தில், கவுண்டமணியின் டயலாக்குகளை இடையிடையே ஒளிபரப்புவார்களாம். விழுந்துவிழுந்து சிரிக்க வைத்தாலும் அதற்குள்ளிருக்கும் உண்மை புரிந்து எங்கள் பணத்தை எங்களிடம் சேர்க்க வேண்டும் என்று கோரிக்கை வைப்பார்களாம் அப்போது.

இந்த பிரஸ்மீட்டில், விநியோகஸ்தர் சிங்காரவேலன், ரோகினி பன்னீர் செல்வம், தயாரிப்பாளர் மன்னன் உள்ளிட்ட பலர் கலந்து கொள்கிறார்கள். இங்கு வைக்கப்படவிருக்கிற இன்னொரு முக்கியமான விவாதம் ஒன்று இருக்கிறது. அது?

‘முதல்ல இந்த பனிரெண்டரையை வாங்கிக்கங்க. வேந்தர் மூவிஸ் மற்றும் பாதிக்கப்பட்ட விநியோகஸ்தர்கள் எல்லாரும் சேர்ந்து ஒரு படம் தயாரிங்க. அதில் நான் நடிச்சுக் கொடுக்குறேன். அதில் கிடைக்கிற லாபம் 25 கோடியை நீங்களே பிரிச்சுக்கங்க’ என்று வாய்மொழி உத்தரவாதம் கொடுத்திருந்தாராம் ரஜினி. அந்த கால்ஷீட் எப்போ கிடைக்கும் என்றும் கேள்வி எழுப்புவார்களாம். ஒருவேளை ரஜினி கால்ஷீட் தராத பட்சத்தில் அவருக்கு ரெட் போடப்படும் என்றும் அச்சுறுத்துவார்களாம்.

மிச்ச பணம் ஆறரை கோடியை கூட உங்களால் உருப்படியா சண்டையில்லாம பிரிச்சுக்க முடியல. இதுல ரஜினி கால்ஷீட் வாங்கி படமெடுத்து அதில் வர்ற லாபத்தை பிரிச்சுப்பாங்களாம்! உடம்புல இருக்கிற ஒன்பது துவாரத்தாலேயும் சிரிச்சா கூட, இந்த ஜோக் அடங்காது போலிருக்கே!