ரமேஷ் அரவிந்த் இயக்கத்தில் கமல் ஹாசன் நடித்திருக்கும் 'உத்தம வில்லன்' திரைப்படம் ஏப்ரல் 10-ம் தேதி வெளியாகிறது.

'உத்தம வில்லன்' படத்தில் கமல் ஹாசன், ஆண்ட்ரியா, பூஜா குமார், கே. பாலசந்தர், விஸ்வநாத், ஜெயராம், நாசர், ஊர்வசி, எம்.எஸ்.பாஸ்கர், பார்வதி, பார்வதி நாயர், சித்ரா லட்சுமணன் உள்ளிட்ட பலர் நடித்துள்ளனர்.

உத்தமன் என்ற 8-ம் நூற்றாண்டுக் கூத்துக் கலைஞன் கதாபாத்திரம், மனோரஞ்சன் என்ற 21-ம் நூற்றாண்டின் சினிமா உச்ச நட்சத்திரமாக மற்றொரு கதாபாத்திரம் என கமல் இரட்டை வேடங்களில் நடித்துள்ளார்.

ரமேஷ் அரவிந்த் இயக்கி இருக்கும் இப்படத்துக்கு கமல் ஹாசன் கதை, திரைக்கதை, வசனம் எழுதியிருக்கிறார் . ஜிப்ரான் இசையமைத்துள்ளார். திருப்பதி பிரதர்ஸ் நிறுவனம் இப்படத்தை தயாரித்திருக்கிறது.

சமீபத்தில் 'உத்தம வில்லன்' திரைப்படத்தின் இசை வெளியீட்டு விழா சென்னையில் நடந்தது. 'உத்தம வில்லன்' ட்ரெய்லர் இணையத்தில் மிகப்பெரிய வரவேற்பைப் பெற்றது.

தற்போது 'உத்தம வில்லன்' திரைப்படத்தின் ரீரெக்கார்டிங் பணிகள் வேகமாக நடந்து வருகின்றன. ஏப்ரல் 2-ல் வெளியாவதாக அறிவிக்கப்பட்ட 'உத்தம வில்லன்' திரைப்படம் ஏப்ரல் 10-ல் வெளியாகிறது.